BYD Avropa bazarında Tesla-nı geridə qoydu
İyulda Avropada avtomobil satışlarının 5,9% artması fonunda Çin şirkəti BYD-nin bazar payı diqqəti çəkir.
İyulda Almaniyada satışlar artsa da, Böyük Britaniya, Fransa və İtaliyada azalıb.
Avropa Avtomobil İstehsalçıları Assosiasiyasının (ACEA) məlumatına görə, iyul ayında Avropa İttifaqı, Avropa Azad Ticarət Assosiasiyası (EFTA) və Böyük Britaniyada yeni avtomobil satışları 1,09 milyon ədədə yüksəlib.
Elektrikli avtomobil satışları artarkən, Tesla ardıcıl yeddinci ay bazar payını itirdi və satışları 40,2 faiz azaldı. Onun çinli rəqibi BYD ABŞ avtomobil istehsalçısını ötüb.
İlk dəfə aylıq satış hesabatına daxil edilən BYD-nin satışları 225,3 faiz artaraq, bazar payı iyul ayında 1,2 faizə çatdı. Bununla yanaşı, Tesla-nın bazar payı keçən il 1,4 faizdən 0,8 faizə düşüb.
Ötən illə müqayisədə Volkswagen-in satışları 11,6 faiz, Renault-nun satışları 8,8 faiz artıb, Stellantis-in satışları isə 1,1 faiz azalıb.
AB-də elektrikli avtomobil satışında artan sürət
Təkcə Avropa İttifaqında ümumi avtomobil satışları 7,4 faiz artıb. Tam elektriklə işləyən avtomobillərin satışı 39,1 faiz, hibridlərin (HEVs) 56,9 faiz, plug-in hibridlərin (PHEVs) isə 14,3 faiz artıb.
ACEA-nın məlumatına görə, iyunda Avropada minik avtomobillərinin satışının 59,8 faizini hibridlər və elektrik avtomobilləri təşkil edib, keçən ilin eyni dövründə bu rəqəm 51,1 faiz təşkil edib.
Volkswagen kimi avropalı avtomobil istehsalçıları Çin şirkətləri ilə rəqabət aparmağa və Avropada elektrikli avtomobillərin satışını təşviq edən qaydalara əməl etməyə imkan verəcək yeni müəssisələrin yaradılması üzərində işləyirlər.
